याबरोबरच कल्याणस्वामींच्या हस्ताक्षरातील मनाचे श्लोक, तसेच विविध समर्थ वाङ्मय (हे श्रीकल्याण पोथा म्हणून ओळखले जाते), एकनाथी भागवताची श्रीसमर्थ पूर्वकालीन प्रत, सचित्र पंचरत्नगीता, श्री कल्याणस्वामींनी दिवाकर यांना लिहिलेले पत्र, श्री कल्याणस्वामींनी रेखाटलेले हनुमंताचे चित्र, कवी जयदेव रचित गीत गोविंद काव्याची भारतीय उपखंडातील एकमेव उपलब्ध प्रत, विविध भाषांमधील ग्रंथ, बखरी, त्याशिवाय व्याकरण, संगीत, रागदारी, जमाखर्च, गणित, मंत्रतंत्र, आयुर्वेद, व्रतवैकल्ये, ज्योतिष, यंत्रे, ताम्रपट इ. अनेक चमत्कृतीपूर्ण व ऐतिहासिक महत्त्वपूर्ण दस्ताऐवजांचा एकत्रित अनुभव इथे आपल्याला घेता येतो. श्रीसमर्थ संप्रदायाव्यतिरिक्त ८०० हून अधिक तत्कालीन संतांचे वाङ्मय इथे मूळ स्वरुपात उपलब्ध आहे. विषयांनुसार मांडणी करावयाची झाल्यास पोथीपत्रे २९२, युद्धासंबंधी ५३, ज्योतिषासंबंधी ४२, जमाखर्चासंबंधी २४, चित्रांविषयी २३, औषधांविषयी ४५, गाण्यांविषयी २० व किरकोळ विषयांवरील ६९ बाडे येथे पहावयास मिळतात. १०० वर्षापूर्वीच्या बाडांपासून ३५० वर्षापूर्वी पर्यंतची बाडे उपलब्ध आहेत.