श्री समर्थ वाग्देवता मंदिर हस्तलिखितांचे संशोधन करणारी संस्था आहे. त्यामुळे पारंपारिक मंदिर असे त्याचे स्वरुप नाही. श्री शिव-समर्थकालीन विशाल हिन्दुस्थानात विखुरलेल्या रामदास स्वामींच्या सुमारे ११०० मठातून कष्टाने आणि प्रयासाने समर्थहृदय श्री नानासाहेब देवांनी हस्तलिखिते मिळविली. मिळविलेल्या कागदपत्रांचे संकलन, संरक्षण, संशोधन आणि प्रकाशन हे येथिल नित्योपचार आहेत. त्याद्वारे सरस्वतीची म्हणजेच वाग्देवतेची उपासना, अखण्ड ज्ञानयज्ञाप्रमाणे येथे चालू असते.